Met die jagseisoen net om die draai, het Bonus namens al die jagters onder ons lede gaan uitvind wat die nuwe nuwe Wapenwet behels. Die nuwe wet op die beheer van vuurwapens het op 31 Julie in werking getree. Vir soverre die owerheid se stelsels en strukture dit toelaat, word die nuwe wet nou toegepas. En waar die nodige praktyk ontbreek, geld die ou wet steeds. Die nuwe wet het twee vername aspekte wat jagters raak hernuwing en opleiding.

Oor die volgende vier jaar moet alle huidige lisensies hernieu word. Wapeneienaars wat vanaf Januarie tot Maart verjaar, moet voor 31 Maart 2006 hulle lisensies hernieu, April tot Junie doen dit voor 31 Maart 2007, Julie tot September voor 31 Maart 2008 en die laastes in 2009.

Lisensiëring moet voorafgegaan word deur vaardigheidsopleiding in wapenhantering en kennis van die wet. Teoretiese sowel as praktiese opleiding moet by ‘n opleidingsinstansie wat beide SAS Seta (Police and Security Sector Training Authority) en SAPD geakkrediteer is, voltooi word. Die praktiese skietwerk moet verder op ‘n SABS 3503-geakkrediteerde skietbaan plaasvind. Daar is vier kategorieë van vaardigheidsopleiding, naamlik handwapen, jaggeweer, haelgeweer en semi-outomatiese gewere. Vir leke kan die opleiding tot 100 uur duur. Erkenning word egter aan huidige kennis en vermoëns gegee. Die opleidingsbedryf noem dit RPL (Recognition of Prior Learning). Daarvolgens sal ‘n daglange kursus waarskynlik voldoende wees vir die meerderheid jagters. Die kursusse se koste beloop tans sowat R400 vir die eerste kategorie wat voltooi word en dan halfprys vir elke volgende kategorie.

‘n SAS Seta-sertifikaat word nou aan die leerder uitgereik. Hiermee gaan hy SAPD toe. As hy 21 jaar oud is, ‘n SABS-kluis het en aan al die karakter vereistes voldoen, ken die SAPD ‘n bevoedheid sertifikaat aan hom toe. Die koste hiervan is tans R70. Die individu is nou vir vyf jaar gelisensieer en hierna kan hy aansoek doen om lisensiëring van die wapen. Die koste is R140 vir ‘n nuwe aansoek en R70 per wapen vir hernuwings. Om tyd te spaar, kan die laaste twee aansoeke gelyk ingedien word. Hou egter in gedagte dat die risiko van ‘n -administratiewe fout hierdeur verhoog word.

Vir die eerste rondte van hernuwings word ‘n toegewing gemaak waarvolgens slegs die teoretiese gedeelte van die SAS Seta opleiding gedoen hoef te word. Dit kos sowat R200. Die SAS Seta reik tans nie ‘n sertifikaat hiervoor uit nie, die opleidingsinstansie se eie sertifikaat word hiervoor aanvaar. Die bedryf verwag weer, soortgelyk aan die fiasko met bestuurderslisensies, ‘n dolle gejaag op die laaste nippertjie. Die vaardigheidsopleiding se sertifikaat is tydloos. Daarom word jagters dus aangemoedig om binne die volgende maand of twee die hele kursus te voltooi. Ná 2008 is dit in elk geval verpligtend om oor die volle kursus te beskik.

As jy vir ‘n vyfde (of meer) wapen aansoek doen, benodig jy verder ook status as Toegewyde Jagter. Hierdie status word nie deur die SAPD uitgereik nie, maar deur ‘n geakkrediteerde jagtersver-eniging. Daar is tans 21 jagtersverenigings met geakkrediteerde status. Die SA Jagtersvereniging en SA Wingshooters is direk geakkrediteer. Die negentien Chasalidverenigings het hierdie status via ‘n sambreelakkreditasie van Chasa. Die lidverenigings sluit Amatola Hunters, Big Bore Association of South Africa, Border Hunting Club, Bosveld Jagters, Bosveld Wapen en Ammunisievereniging, Eastern Cape Game Management, Handwapenjagtersvereniging van Suider-Afrika, Hoëveld Jagters, Kaapse Jagters, Kalahari Jagters, KwaZulu-Natal Jagters, Laeveld Jagters, Noord-Kaap Jagters, Noordwes Jagters, Probleemdierbeheervereniging van SA, SA Sport en Jagfederasie, SA Jaggeweerskietvereniging, Suid-Kaap Jagters en Vrystaat Jagtersvereniging in. Hierbenewens het drie van hierdie Chasa-lidverenigings ook geakkrediteerde status in eie reg bekom. Ons sal in die volgende uitgawe van Bonus breedvoerig verduidelik hoe Toegewyde Jagter status bekom word.